mohobbat ke liye nafrate..

tumhara chale jaana shayad tumhare liye aasan tha
par meri mushkile tum bhada gye

tumhara na aana lautke shayad tumhare liye aasan tha
par mere dil me jage armaan tum bhada gye

tumhara mujhko dekhna yu door se shayad tumhare liye aasan tha
par meri tadap ko tum bhada gye

tumhara har waada tod jaana shayad tumhare liye aasan tha
par mere dil me lagi aag ko tum humesha ke liye bhada gye

tumhara yu mujhko bechain karna shayad tumhaare liye aasan tha
par mere dil me mohobbat ke liye nafrate tum bhada gye..

koi to ho..

ek khula hua rasta ho
ek chehra hasta hua ho
is dard ki nagri se door
koi to gaao basta ho..

koi khwab samajhta ho
koi bin bole sab samajhta ho
is dikhawe ki nagri se door
koi to hasi me ulajhta ho..

koi dard sametta ho
koi khushi kuretta ho
is andh nagri se door
koi to ujaala lapetta ho..

koi to milan ke liye tarasta ho
koi to baarish jaisa barasta ho
is pyaasi nagri se door
koi to upwan me garajta ho..

kuch likhne ka khayal aaya..

aaj fir kuch likhne ka khayaal aaya
to hothon pe sirf tera naam aaya

kalam uthaaya kuch shabd pirohne ko
to sirf tera hi khayal aaya

kyu ubhar nahi paata main us jazbaat se
jo main sadiyo pehle chod aaya

shayad teri shaksiyat hi kuch aisi hai
ki tere liye main khud ko hi khud se chod aaya

kabhi kabhi to soch me pad jaata hu
ki kyu tujhe chaahne ka kabhi khayaal aaya

par fir ye sochke samjha leta hu
ki kaun kabhi is dil ko rok paata

khoobsurat the aur rahenge wo lamhe
jinme main tujpe apna dil lutaa aya

ab koi shikwa nahi hai zindgi se
kyuki tujhe mujhse bhi achi chaahat mile
aaj main khuda se ye dua bhi maang aaya..

kaise bhul jau..

arz kiya tumne mujhse ki main tumhe bhul jau
han bhul sakta hu koi badi baat to nahi

par ye bata kaise wo haseen pal bhul jau
kaise tumhare saath bitaaye lamhe bhul jau
kaise main tumhare diye har nishaan bhul jau
kaise main us pyaar ka har waada bhul jau
kaise tere saath main tapti dhoop me ghumna bhul jau
kaise main mere haath pe tera haath rakhna bhul jau
kaise main tujhse raat raat bhar baat karna bhul jau
kaise main wo intezaar ki anginat ghadiya bhul jaau
kaise main tere liye kia gya har waade ka poora karna bhul jau
kaise main tera mujhe itna chaahna bhul jau
kaise main teri di hui yaadein bhul jau
tere ek kehne pe main chal padta tha jab
kaise main wo mulakaate bhul jau..

wo nafrate liye baithe hai..

aaj fir aankhon se aansu chalke hai
aaj fir wo kisse puraane aa palte hai

bhulne ki koshishe kar rha tha jisey sadiyo se
aaj wo fir nazro me aa baithe hai

rokna chaaha tha jisey mehsus karne se
aaj dil me wohi kuch ehsaas aa baithe hai

tum sahi hi kehti thi ki hum khudgarz hai
tabhi to aaj bhi apni kahaani likhne baithe hai

majboor paate hai hum khud ko bohot
par bas paristhitiyo ko samajhne ki aas me baithe hai

kya khudayi kardi khuda ne bhi
usi ko door kar diya, sadiyo se hum jiske hue baithe hai

meri wafaye thi uske liye aur rahengi sada
par kyu wo mujhe bhulaaye baithe hai

is pyaar bhari zindgi me
kyu wo mujhse hi rishta tod baithe hai

nahi samajh paaye ki itni chaahte dekar bhi
kyu wo humare liye dil me nafrat liye baithe hai..

kaha kisi fakeer ke paas heer chali aati hai..

teri sunehri khushboo mujhe kuch is kadar choo jaati hai
bheeni bheeni hawayein kuch yu muskura jaati hai
aati hai jab tu us khidki pe
to jaise meri saanso me saans aa jaati hai

bas fir to har jagah tu hi nazar aati hai
door rehke bhi teri dhadkane sunaayi aati hai
lagta hai kuch aisa ki jaise
meri rooh teri rooh ko choom aati hai

dekh ke tera sunehra mukhda meri zindgi mehek jaati hai
sach puch to ek pal ke liye ye saansein behek jaati hai
aur usi pal me apne hosh gawah bethta hu
jis pal teri jhuki nazre uthke meri nazro se mil jaati hai

ab to meri har dua me tu aati hai
kyuki na chaahte hue bhi tujhe chaahne ki umeed is dil me utar aati hai
par achaanak tu ojhal ho jaati hai
jab roz sawere meri maa mujhe uthaane aati hai..

tab ehsaas hota hai ki ye to mehez sapna tha
warna kaha kisi fakeer ke paas heer chali aati hai..

is taraf aur us taraf ki kahaani..

ek oor koi kisi ko itni mohobbat karta hai
dusri taraf koi kisi ko thukra deta hai,
ek taraf koi dil jod ta hai
to dusri oor koi kisi ka dil tod deta hai,
ek taraf sannato me bhi gehri khwahishe panapti hai
to dusri oor mehfilo me bhi koi tanha reh jaata hai,
ek taraf mohobbat ke koi daire nahi hai
to dusri oor humesha daire me mohobbat ki jaati hai,
ek taraf bechani kisi ki mohobbat se aati hai
to dusri oor koi nafrat se bechani de deta hai,
ek taraf itna intezaar karta hai koi
to dusri oor sirf intezaar karwaaya jaata hai,
ek taraf chaahke bhi nafrate adaa nahi hoti
to dusri oor mohobbate adaa karne me koi takleef bata deta hai,
ek taraf mann armaano se bhara hota hai
to dusri oor koi khaali bata deta hai,
ek taraf sheeshe ka dil liye firta hai koi
to dusri oor pathar ka koi bana hota hai,
ek taraf koi jism ki khushbu bayaan karta hai
to dusri oor rooh se hai nafrate ye koi batata hai,
ek taraf jeete jee bhi koi kasme waade adaa nahi kar paata
aur dusri oor koi marke bhi apna farz nibha jaata hai..

MAA

kaise tu har baat mujhko samjha deti hai
kaise tu pyaar se mujhko behla deti hai
kaise tu gusse me bhi pyaar jhalkaati hai
kaise tu meri har khwahish poori kar jaati hai
kaise tu mere khaatir raat raat bhar jagti hai
kaise tu mere har sapne ko poora karne ke liye apne sapne tod deti hai
kaise tu mujhse bina kuch chaahe sab kuch kar deti hai
aakhir ye bata kaise tu mujhko sambhaal leti hai
itni khoobsurat hai tu
'MAA' kaise tu mujhko har galti ke liye baar baar maafi de deti hai
kyu tu meri har baat ko itna tavvajo deti hai
kyu tu mere bina bole mere mann ko samajh jaati hai
kar nahi sakta kabhi adaa jo tune diya
par sach kehta hu roz subah khuda me tu hi dikhaayi deti hai..

khush nahi ho kya

kyu roz mere dil me jeene ki tamanna jagaa dete ho
roz mujhe marta dekh khush nahi ho kya?
kyu roz wohi chaahte mere dil me jagaate ho
roz meri tabaahi se khush nahi ho kya?
kyu aaj bhi dete ho pal pal mujhe gum
chaahat ke aankhon me bhare samundar se khush nahi ho kya?
kyu roz mujhe subah jagaane ka naatak karte ho
mere na jaagne se khush nahi ho kya?
kyu roz usi tamanna se mehek uthte ho mere aashiyaane me
kya mere maatam pe bhi khush nahi ho kya?
ab batao kya karu main tumhara sath dene ke liye
maut ke baad bhi maut dene se khush nahi ho kya?

tere bina bhi chal raha tha

Jhoolte the tum kabhi jin kandho pe
aaj unhi pe tumhe chod aaya

kehte to the tum humesha ki humse door jaaoge
par pata nahi tha ki aise farz nibhaoge

tumhe to humesha se sirf maine hi chaah tha
par aaj tumhara bhoj chaar kandho se baanta tha

maanta hu fir bhi khud ko khushbaseeb
ki aakhri waqt me bhi tumhare saath nazar aaya tha

kaise lakdiyo se tumhe dhaka tha
ye sirf mujhe hi nazar aaya tha

kuch hak na dete hue bhi itna bada hak tum mujhe de gaye
ye kaisi adaa se tum apni mohobbat mere naam kar gaye

jab lagaayi aag tumhari deh ko
to socha usi me jal jau..
par pehle hi itna jal chuka tha to socha
aur kaise jal pau..

dekh nahi paaya jab tumhe jaata hua
to adhoora tumhe chod aaya

main tumhe raakh banta dekh
apni raahein mod aaya

wahan tum dheere dheere raakh ban rhe the
ya main bin jale jal raha tha

reh gayi hogi shayad kuch kami meri hi chaahto ki inaayto me
tabhi to main tere bina bhi chal raha tha..

khuda bhi iska gawaah ho gya

mere pyaar kahan hai tu
kyu tu mujhse itna door ho gaya

kya thi teri khwaahishe mujhse
jo to itna majboor ho gaya

chaaha tha tujhe to maine bepanah
kya tujhe chaahna hi meri khata ho gaya

mere majboor dil ki haalat samajh
kyu bin kuch kahe yu khafa ho gaya

tujhse karni chaahi kayi baate dil ki
par tu humesha se hi mujhse alag ho gaya'

ab to bas teri khushiyo ki duyaaein karte hai
kyuki tere mera ye faasla jo ho gaya

ab main kya keh sakta hu
bas ye jaanle ki humesha tere liye kuch to rahunga

ek acha saathi nahi ban paaya to kya
door se hi pyaar nibhaunga

hai is rishte me dum bohot
tabhi to khuda bhi iska gawah ho gaya..

jodna chaahte hai wo silsila aaj bhi jinhe nibhaye arse ho gye...

duniya ki is daud me hum bhi shaamil ho gaye
ab unko chode hue kayi arse ho gye

bhaagta rehta hu na jaane kya paane ko
manzile dekhe hue bhi arse ho gye

bas khalish si hai kuch dil me jo rukne nahi deti
warna mare hue to hume bhi arse ho gye

ek deep jalaaye chal rha hu is andher nagri me
warna ujaala dekhe to arse ho gye

chaahte aaj bhi hai us shaks ki is dil me basi hui
yu to usey door hue arse ho gye

maana saath nibhaane ko hai laakhon yaha
par aaj bhi yaad hai hume wo waade jinhe kiye hue arse ho gye

roz raat yu to beh la lete hai hum kisi ki aahosh me
par bikhre hue to arse ho gye

koshishe jaari hai humari us maala ko pirohne ki
jisey toote hue arse ho gye

miley kisi ko kabhi wo shaks to batana unhe,
jodna chaahte hai hum aaj bhi wo silsila,
jisey nibhaate hue arse ho gye..

ab to bas yehi sochke jeete hai hum..

pyaar ki talaash thi mujhe
par har jagah bas jism ki bhook mili

chaaha tha kisi ko sookhe patte ki taraah
par badle me bas tadap ki aag mili

jal jalke hosh gawah baitha main
par badle me bas gaali dhutkaar mili

karna chaaha khatam apne aap ko
usme bhi na arzi unki poori mili

socha tha zindgi bhar unke pyaar ke sahaare jee lenge
par zindgi me bas tanhai mili

jab is toote dil ko dafnaane ja rha tha main
us gali me bhi unki parchaayi mili

aabad karne ki koshishe karta raha umar bhar
par ishq me bas barbaadi mili

chaaha chaahke fanna ho gye hum
par kya fark padta hai badle me to bas maar hi mili

chod di jeevan pe aisi parchaayi unhone
ki is dil ko fir koi aur na mili

ab to bas yehi sochke jee liya karte hai hum
ki ranjhaa ko bhi heer kahan mili..

teri har adaa yaad aati hai..

In phoool ki kaliyo ko jab khilta dekhta hu
to tere komal hatho ki yaad aati hai,
In khilkhilate panchio ko jab udta  dekhta hu 
to teri pyaari hasi yaad aati hai,
Dekhta hu jab is dharti pe saje har ek noor ko
Muje sabse khubsoorat shaks ki yaad aati hai
aur tab sirf teri har adaa aankho ke saamne chaa jaati hai

tere bin..

kaha chale gye wo din
jab katte na the pal tere bin

kaha chale gye wo din
jab lamhe na hote the koi bhi tere bin

kahan chale gye na jaane wo din
jab hasi koi na hoti thi tere bin

kahan chale gye aaj wo din
jab chalna na hota tha tere bin

aaj kaise jee rha hu tere bin
ye main hi jaanta hu

kaise lamhe guzaarta hu din din
ye khud ko bhi nahi samjha paata hu

bohot kami hoti hai zindgi me tere bin
par mehsoos karne ki chaah me ro jaata hu
isliye mehsoos bhi inhe nahi karna chahta hu

jab kabhi degi zindgi mauka tujhse milne ka
tab tak shayad aadat ho jayegi jeene ki tere bin

aaj bhi apna maanta hu..

Kabhi kabhi to dil ko samjha leta hu
Kabhi kabhi is dil ko yu hi behla leta hu
Nahi samajh paata koi isey fir bhi aise hi isko tehla leta hu
Barso se chahte samet rakhi hai isme
Socha tha mere apne inhe samjhenge
Aaj nahi samajh paaye fir bhi isko main samjha leta hu
Maanta tha ye dil apna tumhe par ye hi jaanta hai kaise in rishto ko sambhaalta hu

Waqt mile kabhi to parakh kar dekhna isey
Kitni yaadein main is dil me tumhari sajaake rakhta hu
Par kya karu hota hai dukh bohot ki tum log isko thukraate ho
Socha tha pyaar se khilega ye dil
Par dil hi jaanta hai kaise roz shaam main tanhayi bhari mehfil sajaata hu

Roz raat pran leta hu ki dil nahi lagaunga apno se ab
par har subah isko bhul jaata hu
fir yaad karta hu sabko
aur apna pran fir ek baar tod deta hu
sochta hu ab to bas yehi
ki kis liye main tumko aaj bhi apna maanta hu..!!

main pal pal marta bhi hu..

main to uljha sa rehta tha chaahat me uski
aur wo samajh na paayi ki main kis gum me hu

main to behka sa rehta tha baaton me uski
aur wo samajh na paayi ki main kis nashe me hu

main to behta hi rehta tha khayaalo me uske
aur wo samajh na paayi ki main kis duniya me hu

main to sota bhi tha to palko me uski
aur wo samajh na paayi ki main itna bekhud kyu hu

main to rota bhi tha to yaadon me uski
aur wo samajh na paayi ki main kis dhun me hu

main to jeeta raha bas uske intezaar me
isliye wo kabhi samajh na paayi ki main pal pal marta bhi hu..

lamha lamha dard de jaate hai..

Wo kehte hai hume unki khushiya raas nahi aati 
par lamha lamha dard to wo hume de jaate hai

kehte hai sabko ki hume unhe aazadi deni nahi aati
Par lamha lamha kaid to wo hume kar jaate hai

Kehte hai wo humse ki hume zindgi ki khushiya jeeni nahi aati
par bataye koi jaake unhe lamha lamha dukh to wo hume de jaate hai

aaj itne saalon baad bhi kehte hai ki hum unhe samajh nahi paaye
par kya wo apne diye zakhm samajh paate hai

kaise hum jiye unke is karz ko lekar
kal ko kahenge ki hum to itna sa karz bhi nahi chuka paate hai

bas koi unse jaake ye puchlo
ki jo wo hume samjhaana chahte hai
kya wo khud bhi samajh paate hai??

aye moorkh praani..

Ae moorkh praani ye kya kar daala tune 
ek masoom kali ko ujaad daala tune

Khil rahi thi jo masoom kali 
usko berehmi se kuchal daala tune

Aye moorkh ye kya kar daala tune
Soch agar teri maa behen ya biwi ke sath ye hota
To kya tu chup reh paata
Par kyu tune kar daala ye

Kyu us masoom kali ka jeevan bhigad daala tune
Kya bhigada tha usne tera 
jo tu daanav banke usko cheer aya
Itni bhook thi to jaake chakle pe paisa deke jism khareed leta
Par teri to wo bhi aukaat nahi tu unko khareed paaye
Kyuki wo bhi tere se zyada aukaat rakhti hai

Aye moorkh kya kiya jaaye tera
Mujhe to lagta hai tere jaise sab moorkho ko baandh diya jaaye zanjeero se 
aur tumhara jeevan un masoom kalio ke hatho me de diya jaaye

Fir bhi wo tumhe nahi maarengi kyuki unme utni insaaniyat fir bhi bachi rahegi
Aur tum to kameene ke kameeme aisi masoom kali ko dekh bhi insaan nahi ban paoge..

koi mujhe jeete jee zinda na dekh paaya..

wo kya samjhega mujhe
jo kabhi mujhe parakh hi nahi paaya

wo kya yaad rakhega mujhe
jo kabhi mujhe sun hi nahi paaya

ajeeb si kashmkash bhari hai dil me
par kyu koi dekhega isey
jab koi mujhe apna hi nahi paaya

main chaahat karte karte
uske itne kareeb ja pohcha
par wo kyu mehsoos karega mujhe
jab wo mujhe dekh hi nahi paaya

inhi khayaalo me jeevan beet gya mera
par koi kyu mere marne pe bhi ayega
jab koi mujhe jeete jee
zinda na dekh paaya..!!